Was macht der Aushilfskiwi wenn er nachts Rufdienst und tags frei hat? Sich der schwäbischen Heimat erinnern und den Backofen anschmeissen. Und weil das Thema jetzt ausgesprochen urschwäbisch wird sodd e eigendlich uff schwäbisch weidrschreiba. Fir alle dia des ned verschdanded tuad mrs zwoar leid, abbr drô endrâ werd e niggs. Suached eich hald oin oddr oine wos eich iebersetza kô.

Ob dui Transliteratio so honderprozendig schdemmd woiss I jedsd au ned, abb irgendwo han I emol des Dach als Omschreibung fir en schwäbische nasal gseha ond des hodd mir irgendwie eigleichted. Abber gnuag Klugscheissereie, eigendlich gôhds jo om selle Bezla ond Laugewegga.

versuche

Vor einiger Zeid schon hod dohanne en Dunedin en Begg uffm Mergd ebbes obodda, des hod der Kerle Laugenbrot dauft. Em Prinzib ischs jo ned schlechd, e weng kompakt von dr Konsischdenz her abbr realtiv en Ordnong. Des henn jedsd abbr rechd viele Leid au so gseha ond blos wegga dem seine Laugebachschdoiner jeden Samschdich friah uffschdande isch oifach ned so onser Sach. Also han i mi an dr Kombjudr ghoggd ond emol guggd was es Indernedd so wois ibbr Laugewegga ond Brezla ond so. Ond wias zom erwarde gweh isch hods no nadierlich en Haufe Rezept gebba. Schlaged me ned, i han des vo me boirische Begg, der allerdengs bei de Fischkepf en Bremen sei Bachschdub hodd, am oifachschde ond logischde gfonda.

Jedsd war blos no des Problem mid dr Lauge zom löse. Gar ned so oifach wia mr denge däd. En dr Abodehk henn se me vielleicht saubleed oglotzd wia i gsagt han, dass i ebbes Natriumhydroxid han welld. Dommerweis wared dia ned so hell ond hend au koi Idee ghed wo mr en Neiseeland Rohchemie kaufe koh. Also widdr ens Inderned. Erschder Treffer d'Firma Pfisterer en Obersulm. Au ned grad dr neggschde Weg vo Dunedin aus. Ond ausserdem welld i gwies ned mit emma Zellner ibbr d'Eifuhr von 15l 36 prozendigr Natronlauge verhandle. Ond scho glei gar ned drmid amme Flughafe drwischd werra. Also weidrgsuachd.
Ond dann hodds do en emma Forum firr Neineiseelandr ond sodde dias werda welled en hoisse Tip gebba: gang en Baumarkt ond kauf Rohrreiniger. En dr Abodehk mached se en jenseits Uffriss om e baar Kiegele von dem Zeig ond em Baumarkt schdohds doseweis em Regal. Guad, Du muasch de ieberwenda deine Brezla en e Briah zdonge, dia aus Rohrreiniger gmachd isch, abbr uff dr Verpackong schdohd druff 100%NaOH ond des hann i jo wella. Also gibbds ebba rohrgreinigde Brezla ond Laugewegga.

Die erschd Charge hann i dann dia Woch ausprobiert ond vor em Nachdenschd bache. I hann sogar mein Kolleg Markus (des isch koi Noma, des isch e Sammelbegriff, gell Herr Scheckeler?) ond sei Famili als Versuchskarniggl gwenna kenna. Ogeblich isch sei Dochdr Lilli vor dem Laugewgga ghoggd ond hod en ogschdrahld als ded er vom Mond komme.

laugawegga

Dia zwoid Versuchserie isch grad aussem Ofa komme ond schmeggd au ned schlechd. Blos des mit de Ärmle muas i no besser nogriage. So rech knuschbrig senn dia no ned. Abber vo ma Pfond Rohrreiniger ko mr oggadich viel Lauge oriahre. Also gibts dohande jedsd au Laugewegga ond Brezla. So wias aussiahd widdr en Grond weniger dohande weg zom wella.

brezelkorb brezel

So genug des schwäbischen. Damit es auch ja alle mitbekommen gehts wieder der Schrift nach weiter. (Was eigentlich eine blöde Formulierung ist, da das obige ja auch geschrieben steht.) Für alle, die es interessiert wir sind tatsächlich im Mai in Deutschland und freuen uns auch schon darauf eine ganze Menge Leute wiederzusehen.